Նյութը՝ Հայաստանի պետական սիմֆոնիկ նվագախմբից
Լուսանկարները՝ Հայաստանի պետական սիմֆոնիկ նվագախմբից
Տեղադրվել է 02-09-2019
Ստեփանակերտի Վերածննդի հրապարակում նախապատրաստվում են երեկոյան համերգին
Ստեփանակերտի Վերածննդի հրապարակում այս պահին ընթանում է «Մաեստրո Մանսուրյան 80» համերգաշարի առաջին համերգի փորձը։

Հիշեցնենք, որ այսօր երեկոյան Հայաստանի պետական սիմֆոնիկ նվագախումբը՝ գեղարվեստական ղեկավար եւ գլխավոր դիրիժոր Սերգեյ Սմբատյանի ղեկավարությամբ, ներկայացնելու է Տիգրան Մանսուրյանի կինոերաժշտությունը՝ նոր գործիքավորմամբ։ Փորձին ներկա է ինքը՝ մաեստրո Մանսուրյանը։

Վերածննդի հրապարակում են մեծ թվով ստեփանակերտցիներ, հյուրեր, որոնք ունկնդրում են փորձը, լուսանկարվում, զրուցում մաեստրո Մանսուրյանի հետ։

Դիրիժոր Սերգեյ Սմբատյանը նկատում է, որ Արցախի Անկախության տոնի նախօրեին տեղի ունեցող այս համերգը միասնության խորհուրդ է պարունակում։ «Մաեստրո Մանսուրյանի երաժշտությունը միշտ էլ համախմբել է հայ ժողովրդին, եւ ես ուրախ եմ, որ մենք այսօր այս համերգով այդ համախմբման մի մասնիկը կլինենք»,- ասաց Սերգեյ Սմբատյանը։

Մինչեւ սեպտեմբերի 13-ը համերգաշրջանի շրջանակներում Երեւանում եւ Գյումրիում կկատարվեն նաեւ Տիգրան Մանսուրյանի կամերային երաժշտությունը, գործիքային կոնցերտները։

Տեղեկացնենք, որ մաեստրո Մանսուրյան համերգաշարը կազմակերպել է Երեւանի քաղաքապետարանը՝ ՀՀ կրթության, գիտության, մշակույթի եւ սպորտի նախարարության աջակցությամբ։